Meri Tehreerein Shab-o-Roz

Meri Tehreer: Jeet Humari Ho Gi

Meri Tehreer: Jeet Humari Ho Gi
Hopeful

Meri Tehreer: Jeet Humari Ho Gi

جیت ہماری ہو گی

ہوتا ہے شب و روز تماشا

بہت دنوں سے میری طبیعت بہت بوجھل سی ہے۔

ماں کوستی ہے کہ اپنے کمرے کو مکمل طور پر مقفل کر کے اندھیرے میں بیٹھ رہنے سے طبیعت بوجھل نہیں ہوگی تو کیا ہوگا؟ ذرا باہر نکل کے دیکھو گلی کوچوں، سڑک بازاروں میں کیا خوب جگمگ ہے۔ میں ماں کی محبت دیکھتا ہوں اور مسکرا دیتا ہوں۔ ماں یہ نہیں جانتی کہ میرابندکمرہ میرے لیے جامِ جم سے بڑھ کرہے جہاں ہوتا ہے شب و روز تماشہ میرے آگے۔

Meri Tehreer: Jeet Humari Ho Gi

میرا دکھ

میں ماں کو کیسے بتاؤں کہ میں کھڑکی سے باہر دیکھتا ہوں تو میرے سامنے رمضان کے بابرکت مہینہ میں افطاری کے وقت آباد محلے میں پڑتے ڈاکے نظرآتے ہیں۔

 یہ بھی دیکھتا ہوں کہ اُسی بابرکت مہینے میں شراب کے نشے میں دھت خبیثوں کو حکومت کی سپیشل گاڑیاں ائر پورٹ سے پِک کرتی ہیں۔

میں یہ بھی دیکھتا ہوں کہ روٹی کومجبورانسان اپنے معصوم اور بے گناہ بچوں کو محنت اور مشقت کرنے پہ مجبورکرتے ہیں۔ بڑے بڑے لوگوں کی بڑی بڑی گاڑیوں کو اپنے ننھے ہاتھوں سے دھو کرمزدوری کی بجائے جواب میں گالیاں کھاتے ہیں۔

اپنی ماں کو میں کیسے بتاؤں کہ اکیسویں صدی میں پہنچ کربھی انسان اِس قدر جاہل اور احمق ہے کہ اجتماعی زیادتی کا حکم دے اور اگر کوئی مختاراں مائی انصاف مانگے تو اُس کے گرد حصار کھڑے کردئیے جائیں۔ میں یہ بھی دیکھتاہوں کہ سیاسی مقاصدکوحاصل کرنے کے لیے گندی ذہنیت رکھنے والے ڈاکٹرشازیہ کی عزت بھی داغدارکرتے ہیں۔

فلم

میرے کمرے کی تاریک دیواریں ایک فلم کے پردے کی مانند ہیں جن پر گزرے ہوئے دور کی انگنت فلمیں چلتی ہیں۔

میں یہ بھی دیکھتاہوں کہ کن امیدوں، آسوں اور نیک تمناؤں کا آسرا لیے بے سروساماں لوگ لٹتے اور بربادہوتے اِس ملک کی سرحدوں میں داخل ہوئے تھے۔ لیکن وہ یہ نہیں جانتے تھے کہ اِس ملک کی بنیادوں میں ملاوٹ ہوچکی۔ مفادپرست شیطان کا روپ دھارچکے ہیں اور وہ اِس کی دھرتی کو تقسیم کرنے کا بندوبست کرچکے ہیں۔

میں یہ بھی دیکھتا ہوں کہ ایوب خان کے دور میں ترقی کی ایک نئی لہر نے جنم لیا اور ملک میں خوشحالی ہونا شروع ہوگئی۔ عوام اپنی امنگوں کو پوراہوتے دیکھ رہی تھی مگر پھر وہی مفاد پرست مافیا چھا گیااور وہی ایوب خان لیڈر کی بجائے ڈکٹیٹر بن گیا۔ بنگالیوں کا حق ان سے چھین لینے کی کوشش کی جانے لگی جس نے اُن میں غدار پیداکیے۔

 یحییٰ خان جیسا بد کردار لیڈرکوحکومت کی عنوان سنبھالتے دیکھتا ہوں اور اپنے مفاد کی خاطر ملک کے دوٹکڑے کردئیے جاتے ہیں۔ بنگلہ دیش کا منحوس نام جنم لیتا ہے۔

میں یہ بھی دیکھتاہوں کہ وہی بھٹو، جو کبھی ‘تم ادھرہم ادھر’ کا نعرہ لگاتا ہے، آج اسی کی آواز عوام کی آواز قرارپاتی ہے۔

لوگ بھٹو کی ایک ایک پکار پہ لبیک کہتے دیوانہ وار آگے بڑھتے ہیں۔ ملک میں ایک نئے دور کا آغاز ہوتابھی دیکھتاہوں۔

میں یہ بھی دیکھتاہوں کہ یہی بھٹو تھا جس نے للکار کرکہاتھا کہ اگر بھارت ایٹم بم بناسکتا ہے تو ہم بھی بناسکتے ہیں اور یہی بھٹو اپنے ایٹمی پروگرام کاآغازکرتا ہے۔ وہ دن جب بھی نہیں بھولتا جب یہی بھٹو اقوامِ متحدہ میں بیٹھ کر امریکی، برطانیوی، روسی سامراجوں کے سامنے اپنے کاغذات پھاڑکرپھینکتا ہے اور کہتا کہ میری عوام مررہی ہے اور تمہیں سمجھوتوں کی پڑی ہے!

اِسی سکرین پہ میں یہ بھی دیکھتاہوں کہ یہی بھٹو شاہِ ایران کے ساتھ معاہدہ کرتا ہے کہ ہم بلوچستان سے تیل نہیں نکالیں گے اور تیل کے کنوؤں کو بارود سے بھر دیاجاتا ہے۔ میں یہ بھی دیکھتا ہوں کہ یہی بھٹو ملک کے کاروبار کو سرکاری تحویل میں لیکر ملکی معیشت کا بیڑا غرق کر دیتا ہے۔  اور پھر اِسی بھٹوکوامریکہ اپنے ایک اور پالتوجنرل ضیا کے ہاتھوں پھانسی پہ چڑھا دیتا ہے!

Meri Tehreer: Jeet Humari Ho Gi

آمریت

اپنے اسی بند کمرے سے میں یہ بھی دیکھتاہوں کہ کیسے ضیا دور میں ملک کی حالت بُری سے ابترہوتی ہے۔ کہیں ضیا کی آمریت کی وجہ سے کراچی کی روشنیوں کو بدتری کی وہ مثال بنایا جاتا ہے جہاں بوریوں میں بیگناہوں کا قتل کیا جاتا ہے اور دہشتگردی کی وہ مثال قائم کی جاتی ہے جسکا کوئی ثانی نہیں۔

وہ دور جب الطاف حسین جیسا بدکردارترین دہشتگرد پیدا ہوتا ہے۔ میں یہ بھی دیکھتا ہوں کہ کیسے ضیا نے دولت اور اسلحہ حاصل کرنے کے لیے مذہبی دہشتگردوں کیساتھ ملکر مجاھدین کا وجود قائم کرتا ہے۔ وہی مجاھدین جو مستقبل میں طالبان کی صورت میں پاکستان کا امن تباہ کرتے ہیں۔

میں اپنے اس بند کمرے کے جامِ جم سے یہ بھی دیکھتا ہوں کہ کیسے ضیا ہی نے کل طاقت رکھنے کے باوجود اسلام کو نافذ نہیں کیا اور نظامِ مصطفی ٰ کے نام پر دین کے ساتھ گنواؤنا مذاق کیا۔ قائد کی سالگروں پر کیسے دانشوروں کے جھرمٹ اکٹھے کر کے ملک کا پیسہ اور وقت برباد کیا۔

میں یہ بھی دیکھتا ہوں کہ ضیا ہی نے لاہور کی گلیوں سے اٹھا کر ایک ایسے ناسور انسان کو جو کہیں چپڑاسی لگنے کے قابل نہیں تھا اسے پنجاب کا وزیرخزانہ لگا دیا۔ وہ ناسور جس نے بعد میں پاکستان میں کرپشن کا وہ بازار گرم کیا جس نے پاکستان کو ڈیفالٹ ہونے کے قریب لا کھڑا کیا۔

اور پھروہ دور آتا ہے جہاں رہی سہی حالت بھی شرمندگی کے پانیوں میں بہہ جاتی ہے۔

خاتون کی حکمرانی

میں یہ بھی دیکھتاہوں کہ ایک خاتون پہلی بار ایک اسلامی ملک کی سربراہی کرتی ہے اور ملک کو خوشحالی کی بجائے لوٹ مار کی ایک نئی راہ دکھلاتی ہے۔

پھر وہ دور بھی آتا ہے جہاں حکومت میں سودے بازیاں ہوتی ہیں اور اِس وطن کو نوچ نوچ کرلوٹاجاتا ہے۔

جاہل انپڑھ ،خریدی ہوئی ڈگریوں سے وزراتیں حاصل کرنے والے ملک کے سیاہ و سپید کے مالک بنتے ہیں۔ عوامی بدحالی اپنے عروج کی جانب بڑھتی چلی جاتی ہے اور مہنگائی غریب کی کمریں توڑنے کے لیے کافی ہے۔ میں یہ بھی دیکھتاہوں کہ پڑھے لکھے نوجوانوں کی روزیاں نہ ملنے کی وجہ سے ڈاکے ڈالنے پر مجبورکیا جاتا ہے۔

اپنے جسموں کے مدوجز اور حرکات و سکنات کو بدل کر خواجہ سراؤں کے روپ میں ڈھلنے پر مجبور کر دیا جاتا۔ محافظوں کو عزتیں لوٹتے بھی دیکھا ہے۔

میں یہ بھی دیکھتا ہوں کہ لوگ اپنے ملک کے حالات سے اِس قدربدظن ہوچکے ہیں کہ وہ کہیں بھی باہربھاگنے کے درپہ ہو جاتے ہیں۔

اِسی کشمکش میں کئی خوبرو نوجوانوں کو سرحدوں پہ گولیوں کا نشانہ بنتے دیکھتاہوں۔ میں یہ بھی دیکھتا ہوں کہ لوگ غیروں کے بچوں کو اپنا بچہ بنا کر، بہن کا اپنے بھائی کو اپنا شوہرظاہر کر کے ویزے لگواتے دیکھتا ہوں۔

میں یہ بھی دیکھتا ہوں کہ وطن کے سرمائے کو ایک اچھامستقبل دینے کی بجائے انہیں ہیروئن اور چرس پہ لگایا جاتا ہے۔

گلی کوچوں میں گناہوں کے بازار سرگرم کیے جاتے ہیں۔

میں یہ بھی دیکھت اہوں کہ کیسے ایک محسن کو ملک کی حفاظت کے لیے دن رات کی محنت کرنے کے صلے میں کس طرح ذلیل و رسوا کیاجاتا ہے۔

میں یہ بھی دیکھتا ہوں کہ کتابوں کی دکانوں کی جگہ پر اب ویڈیوز اور  ڈی وی ڈیز کی دکانوں کو ترجیح دی جاتی ہے اور گلی کوچوں میں معصوم بچوں کو فحش فلمیں دکھائی جاتی ہیں۔

Meri Tehreer: Jeet Humari Ho Gi

اندھیرے

میں نے یہ بھی دیکھا ہے کہ کیبل کی لعنت کس طرح بچے کھچے ذہن کو اپنی لپٹ میں لے لیتی ہے اور فحاشی کا سرِعام ارتکاد کیا جاتا ہے۔

 استاد کا احترام سلف ہوتے بھی میں نے دیکھا ہے اوریہ بھی دیکھا ہے کہ علم دینے والے اساتذہ میں بھی ایسے ناسور پائے گئے ہیں جو ٹیوشن کے پردے میں بدکاری تک کرتے ہیں۔

 اونچ نیچ کی ایسی دیواریں دیکھی ہیں کہ انسان کی پہچان اُس کی پیدائش پر ہی ہوجاتی ہے، اور انسان وہی ہے جو پیسہ اور روپے والے گھر میں پیدا ہو، باقی کیڑے مکوڑے ہیں جنہیں اپنا اپنا فنکشن پوراکرنا ہے۔

میں نے یہ بھی دیکھا ہے کہ بلند وبالا دعوے کرنے والے کس طرح عیار اور مکار ہوتے ہیں کہ وہ اپنے ملک کی سپریم کورٹ میں بیٹھ کر ایک دوسرے پر گالی گلوچ اور ہاتھا پائی کرتے ہیں۔

 مذہب کا نام لینے والوں کو دہشت گرد کہلواتے بھی دیکھا اور انہیں چن چن کر مارتے بھی دیکھا ہے۔ میں نے ایک ایسی جنگ بھی دیکھی ہے جس کا کوئی وجود ہی نہیں اور جو اپنے مفاد کی خاطربڑھکائی گئی ہے۔

میں یہ بھی دیکھتا ہوں کہ قوم کی اکثریت میں ہڈحرامی بڑھتی چلی جارہی ہے، پیسہ والے اپنے ہاتھوں کام کرنے کو اپنی شان کے خلاف سمجھتے ہیں،حکمرانی کرنے کی ہوس سب میں ہے۔

 یہ بھی دیکھتا ہوں کہ بے حسی دیمک کی طرح ہمارے دلوں کو چاٹ رہی ہے، اپنے سامنے روزانہ ناانصافیاں ہوتے دیکھتے ہیں مگر گواہی تک نہیں دیتے، اپنے اپنے کام جلد سے جلد کروانے کے لیے رشوتیں دیتے ہیں اور اپنے ہاتھوں سے ایک مافیا کو جنم دیتے ہیں…..

عافیت

 اپنی ماں کو کیسے میں سمجھاؤں کہ ماں کپڑا اٹھاؤں تو اپنا ہی پیٹ ننگا ہوتا ہے، بہتر ہے یہی کہ مجھے میرے بند اور تاریک کمرے کی چاردیواری میں قیدرہنے دے!

میں بہت سخت دل تھا، مجھے اپنے ضبط پہ ناز تھا مگر آج کیوں میری آنکھیں بھرآئی ہیں؟ یہ کیسا رنج ہے مجھے؟ شاید یہی وطن سے محبت ہے جو مجبورکرتی ہے کہ میں کہیں بھی چلا جاؤں میری پہچان پاکستانی کی طرح سے ہی ہوگی۔ یہی میری ابتدأ تھی اور یہی میری انتہا ہے! میں اپنی پرنم آنکھوں کوبند کیے کھڑکی کی جانب منہ کرتاہوں جس پہ بڑے بڑے پردوں نے مکمل اندھیرا کیے ہوا ہے!

مگر!!

یہ ایک روشنی کی کرن کیسے آئی میرے کمرے؟ میں لپک کر نہ چاہتے ہوئے بھی پردہ اٹھاتا ہوں اور دیکھتا ہوں کہ باہر ایک نئی صبح جنم لے رہی ہے۔

ابھرتاہوا سورج اِس بات کی دلیل ہے کہ صبح ضرور ہوگی! وہ دن ضرور طلوع ہوگا جو ہمارا دن ہوگا!

نیچے صحن میں معصوم بچوں کو سبز ہلالی پرچم لیے ایک امید سے بڑھتا ہوا دیکھتا ہوں تو میرے اندر ایک نیا حوصلہ جنم لیتاہے! مجھے یاد آنے لگتا ہے کہ یہی وہ دھرتی ہے جس نے عبدالستارایدھی کو جنم دیا، حکیم سعید بھی یہی تھے ،ڈاکٹرغلام مصطفےٰ ملک اور ڈاکٹراسراراحمد جیسے مدبر بھی۔ بچوں کے کرکٹ میچ سے مجھے یاد آنے لگتا ہے کہ یہی پر وہ مردِ بحران بھی پیدا ہوا تھا جس نے ایک کمزور اور ضعیف ترین ٹیم کو وورلڈچمپئن بنایا تھا۔  مجھے یاد آنے لگتا ہے کہ انہی بچوں میں سے کوئی حسن سردار بنے گا، کوئی کلیم اللہ سمیع اللہ بنے گا۔ یہی سے جہانگیرخان جنم لے گا۔

ایسے غمخواربھی دیکھے ہیں جنہوں نے اپنی زندگیاں انسانیت کے لیے وقف کردی ہیں۔ اگر برائیوں کی لسٹ لمبی ہے توا چھائیاں بھی تو ہے نا

…اور امید کی ایک کرن اگر ایک دیے کوروشن کرتی ہے تو اِس دیے سے نجانے کتنوں کا بھلا ہو اور کتنے دیے مزید جلیں!

میں اپنے مقفل کمرے کو کھول دیتا ہوں اورصحن میں جاکر بچوں کے ساتھ اپنے ہاتھوں میں سبز ہلالی پرچم لیکر شامل ہوجاتا ہوں ۔ اِس امید پر کہ:
’’جیت ہماری ہوگی، ہاریں گے اندھیارے، اک دن پورے ہونگے، سارے خواب ہمارے‘‘!!!


تحریر: مسعود ؛ کوپن ہیگن؛۲۴ جولائی ۲۰۰۵

Shab-o-roz

About the author

Masood

ایک پردیسی جو پردیس میں رہنے کے باوجود اپنے ملک سے بے پناہ محبت رکھتا ہے، اپنے ملک کی حالت پر سخت نالاں،۔ ایک پردسی جس کا قلم مشکل ترین سچائی لکھنے سے باز نہیں آتا، پردیسی جسکے قلم خونِ جگر کی روشنائی سے لکھتا ہے، یہی وجہ ہے کہ وہ تلخ ہے، ہضم مشکل سے ہوتی ہے، پردسی جو اپنے دل کا اظہار شاعری میں بھی کرتا ہے

Add Comment

Click here to post a comment